Os alumnos/as da materia de segundo de Bacharelato "Métodos estadísticos e numéricos" dirixidos polo seu profesor Antonio López, estiveron realizando ao longo da primeira avaliación un estudo estadístico sobre a intención de voto nas eleccións xerais do 10 de Novembro na provincia de Ourense. Tras un traballo no que recolleron un total de 236 enquisas por distintos puntos da provincia acertaron de pleno no seu prognóstico:

Empate entre PP e PSOE en intención de voto e consecuente reparto de escanos, recibindo dous cada un deles. Pódese consultar o informe polo miúdo da análise completa no seguinte enlace:

• Traballo completo da enquisa

Este curso inauguramos un novo botiquín. Está situado no antigo cuarto da telefonista. Contamos con caixas para facer curas, unha cadeira de rodas e padiola para casos de mareo.

O centro tamén se fixo cun desfibrilador polo que nos convertemos así en "Centro Cardioprotexido". En breve varios profesores, algúns alumnos e persoal non docente realizaran unha formación específica para o seu uso.

De tódolos xeitos esperemos darlle moi pouco uso

A Consellería de Educación acaba de recoñecer o traballo que viña desenvolvendo a nosa Aula Medioambiental, concedéndonos o recoñecemento dela coma "Club de Ciencia".

Este recoñecemento oficial daralles a posibilidade tamén de realizar máis actividades das que viñan realizando hasta esta data e seguir traballando aínda máis na educación medioambiental a través do noso contorno.

Dous dos nosos alumnos foron convocados para formar parte da selección galega xuvenil de hockey herba que xogará o Campionato de España de selecións autonómicas entre os días 23 e 27 de outubro en Valencia.

Trátase de Daniel Vilar de 4º ESO B (dereita), integrante do Club Hockey Barrocás, e Alexandre Coello de 2º Bacharelato B (esquerda), do Club Hockey Albor. Enfrontaranse o xoves a Euskadi e o venres a Madrid e Andalucía. Logo a esperar os cruces do sábado e domingo.

Eses días coincidirán no campo coa seleción Española Absoluta que xoga o preolímpico contra Francia para decidir o pase ás olimpiadas de Xapón. ¡Toda unha experiencia para eles!.

Ambos forman parte dunha gran xeración de xogadores que deu o hockey ourensán estes últimos anos e que sempre deron a talla nos diferentes campionatos de España que participaron cos seus respectivos clubs ou coa selección.

¡Moita sorte e a desfrutar da vosa paixón polo hóckei!

A aula da natureza xa comezou as súas actividades. O 27 de setembro realizaron diferentes actividades de sensibilización polo cambio climático.

Pola súa banda existe un nutrido grupo de profesores que este curso se integraron tamén na aula para colaborar. Vanse formar ao longo de todo o ano en diversos aspectos relacionados co noso contorno natural, e xa teñen en mente multitude de actividades: cine, tarefas de limpeza e recuperación do noso contorno, plantacións de diversas especies, creación dunha horta escolar, e varios proxectos escolares nos que pensan participar.